Sezoni 2026/27 nis me një risi për KF Teuta. Klubi durrsak ka prezantuar fanellën e re, të cilën e cilëson “më shumë se një uniformë futbolli”, duke e lidhur atë me historinë, identitetin dhe qytetin e Durrësit.
“Një fanellë që mbart historinë tonë”, është mesazhi me të cilin Teuta ka shoqëruar prezantimin e uniformës së re.
Në komunikimin e klubit, theksi vendoset te rrënjët e Durrësit, qytetit të ngritur në brigjet e Adriatikut dhe të lidhur me trashëgiminë e Epidamnit dhe Dyrrahut. Në këtë histori, Teuta mban emrin e Mbretëreshës Ilire, të cilën klubi e sjell si simbol të forcës, guximit dhe qëndresës.
Fanella e re synon të përcjellë pikërisht këtë identitet, duke lidhur ngjyrat e klubit me qytetin, detin, historinë dhe tifozët që e kanë ndjekur Teutën ndër vite.
“Me këtë fanellë do të përfaqësojmë Durrësin në çdo stadium, në çdo ndeshje dhe në çdo betejë”, shprehet klubi, duke e përmbledhur mesazhin e prezantimit me një ide të qartë: kur lojtarët veshin fanellën e Teutës, nuk veshin vetëm stemën e klubit, por edhe historinë e qytetit.
Ndërkohë, prej dy ditësh Teuta ka nisur zyrtarisht përgatitjet për javën e parë të kampionatit. Sezoni i ri do ta gjejë skuadrën durrsake në transfertë, përballë Partizanit, më 22 gusht, në Stadiumin “Vora”.
Kështu, fanella e re do të ketë premierën e saj në një sezon që Teuta e nis me një tjetër sfidë: të përfaqësojë Durrësin në fushë, me identitetin që klubi kërkon të përcjellë përmes ngjyrave dhe historisë së tij.
©ZëriOnline
