Një tjetër person i shpallur në kërkim ndërkombëtar është lokalizuar dhe arrestuar në Durrës, në kuadër të operacioneve të njëpasnjëshme të Policisë për kapjen e personave të kërkuar nga drejtësia e huaj.
Operacioni i koduar “Next” është finalizuar nga specialistët e Sektorit për Hetimin e Narkotikëve në DVP Durrës, pas koordinimit informativ dhe operacional me autoritetet italiane, përmes Interpol Tiranës.
Në Durrës është lokalizuar dhe arrestuar me qëllim ekstradimin në Itali, Mariglen Tahiri, 33 vjeç, banues në Shijak.
33-vjeçari ishte shpallur në kërkim ndërkombëtar, pasi Gjykata Penale e Breshias i ka caktuar masën e sigurisë “Arrest në burg”, për veprat penale “Trafikimi i narkotikëve” dhe “Pjesëmarrja në organizatë kriminale”.
Sipas autoriteteve italiane, ai akuzohet si pjesëtar i një grupi kriminal të përfshirë në trafikimin e lëndëve narkotike.
Pas arrestimit, Interpol Tirana do të vijojë procedurat për ekstradimin e Tahirit drejt Italisë.
©ZëriOnline
