Një aksident i rëndë rrugor është regjistruar në aksin nacional Lushnje-Berat, ku tre automjete janë përfshirë në përplasje në afërsi të Kashtbardhës.
Sipas informacioneve paraprake, dy prej automjeteve janë përplasur kokë më kokë, ndërsa drejtuesit e tyre kanë marrë plagë të rënda. Të dy janë transportuar në spitalin e Lushnjes për të marrë ndihmë mjekësore.
Drejtuesja e automjetit tip “Fiat”, një prej mjeteve të përfshira në aksident, ka deklaruar se një automjet tip “Benz” po e parakalonte në korsinë me drejtim Lushnjen, kur është përplasur kokë më kokë me një automjet tip “Ford” që vinte përballë.
Nga forca e përplasjes, automjeti “Ford” ka dalë nga rruga dhe ka përfunduar në kanalin anësor.
Policia e Lushnjes ka mbërritur në vendngjarje dhe ka bllokuar qarkullimin në këtë segment rrugor, ndërsa po kryhen veprimet për sqarimin e plotë të dinamikës dhe shkaqeve të aksidentit.
©ZëriOnline
