Dy objekte paleje të ndërtuara si godina hotelerie janë sekuestruar në Ksamil ndërsa ekzekutohet masa e sigurisë “Arrest në shtëpi”, për veprën penale “Ndërtimi i paligjshëm”, për pronarin e tyre.
Komisariati i Policisë Sarandë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Sarandë dhe me Agjencinë e Administrimit të Pasurive të Sekuestruara, kanë kryer procedurat për ekzekutimin e vendimeve të caktuara nga Gjykata e Sarandës, në vijim të hetimeve të kryera për një rast të ndërtimit pa leje, për qëllime fitimi, në Ksamil.
Policia bëri të ditur se në zbatim të vendimit të Gjykatës së Sarandës është ekzekutuar masa e sigurisë “Arrest në shtëpi”, caktuar nga kjo Gjykatë, për veprën penale “Ndërtimi i paligjshëm”, për shtetasin K. P..
Gjykata ka vendosur edhe sekuestrimin e hotelit 5-katësh Central Park Premium dhe të një objekti 1-katësh, në lagjen nr. 2, rruga “Derolli”, Ksamil, të ndërtuara pa leje, për shërbime hotelierie.
Gjatë procedurave për ekzekutimin e vendimit të Gjykatës, u konstatua se hoteli ishte në funksion dhe ishin akomoduar pushues. Për këtë arsye, u morën masa paraprake dhe më datë 6 tetor do të kryhen të gjitha veprimet për ekzekutimin e plotë të vendimit të Gjykatës.
©ZëriOnline
