Zbardhen detaje të reja nga vrasja e dyfishtë në fshatin Demiraj të Gjilanit, ku mëngjesin e sotëm u gjetën të pajetë një 27-vjeçar dhe një foshnjë. Policia e Kosovës ka arrestuar një 65-vjeçar, i cili dyshohet se ka vrarë djalin dhe nipin e tij.
Sipas njoftimit zyrtar të Policisë së Kosovës, ngjarja u zbulua sot, rreth orës 08:47, pas një telefonate që njoftonte për dy trupa të pajetë brenda një banese.
Në vendngjarje mbërritën njësitë policore, Prokurori i Shtetit dhe ekipi i Emergjencës. Mjeku konstatoi se 27-vjeçari, i lindur në vitin 1999, dhe foshnja nuk kishin shenja jete.
Nga hetimet e para, policia dyshon se krimi ka ndodhur brenda familjes. Në lidhje me ngjarjen, autoritetet arrestuan 65-vjeçarin, ndërsa prokurori urdhëroi ndalimin e tij për 48 orë.
Policia po e heton ngjarjen si “Vrasje e rëndë”, ndërsa ende nuk ka bërë të ditur motivin apo rrethanat konkrete në të cilat humbën jetën dy viktimat.
Me urdhër të Prokurorit të Shtetit, trupat e pajetë janë dërguar në Institutin e Mjekësisë Ligjore në Prishtinë për autopsi.
