Një shqiptare 117-vjeçare mund të jetë personi më i moshuar në botë. Bëhet fjalë për Qamile Marrën, nga fshati Ferras i Kuçovës, historia e së cilës është bërë pjesë e një materiali të BBC-së, duke tërhequr vëmendjen edhe të mediave ndërkombëtare.
Sipas dokumenteve të familjes, Qamile Marra ka lindur më 19 gusht 1909. Nëse mosha e saj konfirmohet zyrtarisht, ajo do të ishte dy ditë më e madhe se britanikja Ethel Caterham, aktualisht e njohur si personi më i moshuar në botë.
Jeta e saj përfshin më shumë se një shekull histori. Ajo ka lindur në kohën e Perandorisë Osmane dhe ka përjetuar dy luftëra botërore, periudhën e monarkisë, diktaturën komuniste dhe tranzicionin e Shqipërisë.
Në materialin e BBC-së, 117-vjeçarja ndan edhe mënyrën se si e sheh jetën, me gjithë vështirësitë dhe humbjet që sjell kalimi i kohës.
“Ka shumë gjëra në jetë. Shumë momente të hidhura, por edhe të lumtura”, shprehet ajo.
Pavarësisht moshës së jashtëzakonshme, Marra ruan një pjesë të rutinës së saj të përditshme. Zgjohet herët, kujdeset për lulet dhe oborrin, ushqen pulat dhe shëtit në pemishten pranë shtëpisë. Sipas familjarëve, ajo gëzon shëndet të mirë dhe nuk ka pasur nevojë për përdorim të rregullt të ilaçeve.
Ajo ka sjellë në jetë 7 fëmijë dhe ka parë të rriten 5 breza të familjes. Bashkëshortin e humbi 36 vite më parë, ndërsa sot jeton mes kujdesit të familjarëve dhe vizitave të njerëzve që kanë nisur ta kërkojnë pas publikimit të historisë së saj.
Për jetëgjatësinë, Qamile Marra nuk jep ndonjë formulë të veçantë. Përgjigjja e saj është e thjeshtë:
“Njeriu jeton aq sa ia ka caktuar Zoti”.
Mosha e saj, megjithatë, mbetet për t’u verifikuar nga organizatat ndërkombëtare që dokumentojnë rekordet e jetëgjatësisë. Deri atëherë, Qamile Marra mbetet shqiptarja që mund të jetë vetëm dy ditë larg rekordit botëror.
©ZëriOnline
