Çështja e ish-drejtuesit të Inspektoratit të Mbrojtjes së Territorit në Durrës, Ardian Halili, po merr përmasa të veçanta si në aspektin ligjor, ashtu edhe në atë publik. Në një kohë kur emri i tij lidhet me shembjen spektakolare të kompleksit turistik luksoz “Saint Michelle Residence” në Kepin e Rodonit, një ndërtim pa leje në një zonë të mbrojtur bregdetare, zhvillimet në hetim e gjykim kanë sjellë të tjera pikëpyetje.
Fillimisht, materialet e mbledhura nga policia e Durrësit u deklarua se iu përcollën SPAK-ut, si institucion kompetent për çështjet e korrupsionit në nivele të larta. Por Prokuroria e Posaçme nuk e pranoi dosjen, duke ia lënë Prokurorisë së Durrësit hetimin e mëtejshëm. Ky refuzim i SPAK-ut ngre një dilemë të fortë publike: a kemi të bëjmë me një çështje që nuk i plotëson kriteret për t’u trajtuar nga organi antikorrupsion, apo kemi mungesë provash të mjaftueshme për të mbështetur dyshimet e para?
Në seancën e së shtunës për caktimin e masëssë sigurisë, prokurorja e çështjes, Matilda Fetahu, formuloi vetëm dy akuza ndaj Halilit “ndërtim i paligjshëm” dhe “shpërdorim detyre”, duke hequr dorë nga akuza e tretë e ngritur nga policia për “korrupsion të funksionarëve publikë”. Ky hap tregon një përqendrim të hetimit tek aspektet administrative dhe ligjore të ndërtimit, ndërsa dimensioni i korrupsionit, të paktën për momentin, duket se ka mbetur në hije.
Seanca e drejtuar nga gjyqtari Paulin Çera solli në skenë dhe mbrojtjen e Halilit nga bashkëshortja e tij, Rabiana Halili, ish-prokurore, tashmë avokate. Ajo u shfaq emocionale teksa kërkoi të bindte gjykatën se bashkëshorti i saj nuk kishte shpërdoruar detyrën dhe kërkoi një masë më të butë sigurie. Në të njëjtën linjë qëndroi dhe i arrestuari, pasi deklaroi se punimet ishin kryer me dijeninë e autoriteteve vendore, edhe pse në mungesë të lejes së ndërtimit. Ai kishte marrë miratim për kryerje punimesh në objekt.
Një qëndrim i tillë e vendos mbrojtjen në një linjë të dyfishtë, nga njëra anë pranohet fakti i ndërhyrjes pa leje, ndërsa nga ana tjetër kërkohet përgjegjësi e ndarë me institucionet, bashkinë, që, sipas çiftit Halili, ishin në dijeni të situatës.
Gjykata e Durrësit caktoi ndaj Halilit masën e sigurisë “arrest në burg”, pavarësisht se e vlerësoi si të paligjshëm arrestimin e tij në flagrancë në mesnatën e 26 gushtit. Ky vendim tregon se, ndonëse procedura e arrestit ka pasur mangësi, rrezikshmëria e veprës dhe pesha e provave justifikojnë mbajtjen e tij në qeli.
Rasti i Halilit mbetet i hapur në dy plane, atë ligjor, që përqendrohet te fakti i ndërtimit pa leje dhe te mundësia e shpërdorimit të detyrës, si dhe ai publik, që lidhet me perceptimin për lidhjet mes pushtetit lokal, ndërtimit pa kriter dhe tolerimit institucional. Ndërkohë, refuzimi i SPAK-ut për të marrë përsipër dosjen dhe heqja e akuzës për korrupsion krijojnë një boshllëk që pritet të shpjegohet më qartë në fazat e ardhshme të hetimit.
©️zërionline
