Një ngjarje e rëndë ka tronditur orët e para të mëngjesit të sotëm zonën e Manzës, në Durrës. Rreth orës 01:45 të datës 22 tetor, pranë një karburanti, një konflikt i çastit përfundoi tragjikisht me përdorimin e armës së zjarrit dhe me humbjen e jetës së dy të rinjve.
Viktimat janë identifikuar si Aranit Kurti, 23 vjeç, dhe Flori Paluçi, 33 vjeç, të dy banues në Manëz. Nga të dhënat paraprake të grupit të posaçëm hetimor, dyshohet se pas një përplasjeje për motive ende të paqarta, Flori Paluçi është qëlluar për vdekje nga shtetasi D. P., 21 vjeç, gjithashtu banues në Manëz. Ndërsa Aranit Kurti dyshohet se është vrarë nga vetë Flori Paluçi, pak para se ky i fundit të mbetej i vdekur në vendngjarje.
Burime hetimore bëjnë me dije se konflikti ka nisur fillimisht në një lokal të zonës. Një përplasje verbale mes njërës prej palëve dhe kamarierit të lokalit ka përshkallëzuar shpejt, ndërsa në debat janë përfshirë edhe të tjerë që ndodheshin aty. Fjalët e rënda janë kthyer në ofendime dhe më pas në përleshje fizike, duke përfunduar në përdorimin fatal të armëve të zjarrit.
Policia e Durrësit ka nisur menjëherë kontrolle të gjera në terren për kapjen e 21-vjeçarit D. P., i cili ndodhet në arrati.
Ndërkohë, një grup i posaçëm hetimor, nën drejtimin e Prokurorisë Durrës, po punon në vendngjarje për të zbardhur tërësisht dinamikën e ngjarjes, për të identifikuar çdo person të mundshëm të përfshirë dhe për të siguruar prova që do të ndihmojnë në dokumentimin ligjor të kësaj vrasjeje të dyfishtë, që dyshohet të ketë ardhur për motive banale.
©️zërionline
