Deputetja e Durrësit, Manjola Luku, ka reaguar pas ngjarjes tragjike që ndodhi në Manëz në orët e para të mëngjesit, ku humbën jetën dy të rinj pas një konflikti të çastit. Luku, e cila jeton në këtë zonë, ka shprehur shqetësimin dhe dhimbjen e saj të thellë për krimin që ka tronditur komunitetin.
“Si deputete e zonës, por edhe si banore e këtij komuniteti, shpreh shqetësimin dhe dhimbjen e thellë për ngjarjen e rëndë që ndodhi në Manëz, ku humbën jetën dy të rinj. Kjo ngjarje është tronditëse dhe e papranueshme për të gjithë ne”, – ka shkruar Luku.
Ajo u ka bërë thirrje organeve të rendit dhe drejtësisë që të veprojnë me shpejtësi dhe vendosmëri për të zbardhur plotësisht rrethanat e ngjarjes dhe për të vënë autorët përpara ligjit.
“Dhuna dhe armët nuk mund të jenë kurrë zgjidhje, ato shkatërrojnë jetë, familje dhe dëmtojnë besimin e qytetarëve te siguria dhe drejtësia”, thekson më tej deputetja.
Në fund, Luku ka përcjellë ngushëllimet e saj më të sinqerta për familjet e viktimave, duke e cilësuar këtë humbje si të rëndë dhe të parakohshme për komunitetin e Manzës.
©️zërionline
