Blanche Monnier ishte një vajzë pariziene e shoqërisë së lartë, e njohur për bukurinë e saj. Në Francë, ajo njihet si “La Séquestrée de Poitiers” që do të thotë “Gruaja e Mbyllur e Poitiers”. Arsyeja përse ajo mori këtë titull është tragjike dhe filloi me një histori dashurie që nuk pati kurrë një fund të lumtur.
Monnier ishte nga një familje e pasur dhe e respektuar nga Poitiers. Kur ishte 25 vjeç, ajo u dashurua me një avokat të varfër. Kjo e zemëroi nënën e saj, Louise Monnier, e cila donte që Blanche të martohej me një burrë me pasuri dhe famë. Megjithatë, Blanche refuzoi të hiqte dorë nga dashuria e saj, kështu që nëna e saj e mbylli atë në një dhomë lart në rezidencën e tyre dhe e kyçi me dryn në një shtrat. Blanche qëndroi në këtë shtrat për 26 vitet e ardhshme.
Gjatë kohës që ajo ishte e burgosur në atë dhomë, Louise dhe vëllai i Blanche, Marcel, pretendonin se ajo ishte larguar dhe zhdukur. Familja kishte një reputacion të mirë, pasi ata dhuronin për bamirësi dhe konsideroheshin njerëz inteligjentë dhe punëtorë.
Në maj të vitit 1909, prokurori i përgjithshëm i Parisit mori një letër që përshkruante detaje të situatës së Blanche. Ai ishte aq i tmerruar, sa urdhëroi menjëherë që policia të shkonte në rezidencën Monnier. Duke shkuar lart, ata nuhatën një erë të keqe nga një dhomë me një derë të mbyllur. Ata thyen derën për të gjetur Blanche, e cila ishte në një shtrat e rrethuar me jashtëqitjen e saj, ushqime të prishura, insekte dhe brejtës. Era ishte aq e keqe, sa policët thyen dritaren, e cila kishte qenë e mbuluar për 26 vitet e fundit, që do të thotë se Blanche kishte jetuar në errësirë pothuajse të plotë gjatë gjithë kësaj kohe.
Louise dhe Marcel u arrestuan. Marcel u gjet mendërisht i paaftë për të dalë në gjyq. Louise vdiq nga një sulm në zemër dy javë pas zbulimit të vajzës së saj.
Blanche u dërgua në një institucion psikiatrik, ku vuajti nga çrregullimet mendore gjithë jetën e saj. Ajo vdiq në vitin 1913. Ajo kurrë nuk hoqi dorë nga dashuria e saj, edhe pse ai vdiq gjatë kohës që ajo ishte e burgosur.
Fotografia më sipër tregon Blanche përpara dhe pas burgimit të saj.
Kurrë nuk është zbuluar se kush e dërgoi shënimin tek prokurori i përgjithshëm.
@zërionline
