Gjykata e Durrësit ka vendosur të lërë në fuqi masën e sigurisë “arrest në burg” për 21-vjeçarin Daniel Pepa, i akuzuar për vrasjen e Flori Paluçit më 22 tetor në Manzë. Vendimi u mor këtë të enjte, një ditë pasi i riu u dorëzua në polici së bashku me armën e krimit, e cila është dërguar për ekspertim në laborator.
Seanca, e zhvilluar me dyer të mbyllura, kishte për qëllim verifikimin e kushteve ligjore të masës së sigurisë të caktuar më herët në mungesë me vendimin nr. 692/2, datë 13.11.2025. Para trupit gjykues, Pepa u shfaq i penduar dhe kërkoi falje për krimin, duke deklaruar se ishte gati të përballej me përgjegjësinë e plotë të veprimeve të tij.
Në përfundim të shqyrtimit, gjykata la në fuqi masën “arrest në burg”, duke ngarkuar Prokurorinë dhe policinë gjyqësore me ekzekutimin e mëtejshëm të vendimit.
Hetimet për ngjarjen e rëndë vijojnë, ndërsa i riu Daniel Pepa nga Manza do të qëndrojë në qeli deri në përfundim të hetimeve për vrasjen e dyfishtë që tronditi zonën e Manzës.
