Niveli i lumit Vjosë ka arritur pikën kritike prej 8 metrash, duke shkaktuar përmbytje në disa zona të bashkive Vlorë dhe Fier. Sipas të dhënave zyrtare, 14 banesa janë tashmë nën ujë, 10 në njësinë administrative Novoselë dhe 4 të tjera në Ferras.
Kreu i Emergjencave Civile, Haki Çako, deklaroi se janë evakuuar 14 familje nga zonat më të rrezikuara, ndërsa situata vijon të mbetet e tensionuar për shkak të nivelit të lartë të lumit. Ai bëri të ditur se prurjet e Vjosës kanë qenë në rënie në segmentet e sipërme të rrjedhës, si në l Tepelenë dhe Memaliaj, por kjo reflektohet me disa orë vonesë në zonat e ultësirës.
Forcat e Armatosura dhe strukturat e Emergjencave Civile janë në terren dhe pritet të vijojnë operacionet deri në normalizimin e plotë të situatës, ndërsa monitorimi i prurjeve të lumit vazhdon.
Ndërkaq aksi Delvinë – Kardhiq, pranë tunelit të Skërficës, paraqet vështirësi të mëdha në qarkullim. Aksi është nën pushtetin e ujit që rrjedh, si dhe dherave e gurëve, shkaktuar nga shembjet e rrëshqitjet. Strukturat vendore po punojnë për pastrimin e rrugës, por situata mbetet kritike.
