Pas aksionit të zhvilluar nga FNSH dhe Policia mbrëmjen e sotme në Vlorë, mësohet se 4 persona janë shoqëruar në komisariat.
Dyshohet se 4 të shoqëruarit mbanin peng një person prej disa ditësh për gjobëvënie ose për t’i marrë pasuritë.
Katër të shoqëruarit nga policia e Vlorës dyshohet se kanë marrë peng një shtetas kosovar, të cilin e mbanin në një banesë në afërsi të Rrugës së Re. Madje edhe një nga të shoqëruarit është nga Kosova.
Policia e Vlorës bën me dije se 4 të shoqëruarit ishin nga fshatrat e Lumit të Vlorës dhe i kërkonin 70 mijë euro. Ai është mbajtur peng prej dy javësh dhe sipas policisë, dyshohet se është dhunuar.
Ndërkohë, motra e pengut, e cila jeton në Suedi, ka njoftuar policinë e Vlorës duke bërë të mundur gjetjen e banesës dhe shoqërimin e katër personave.
Forcat e Ndërhyrjes së Shpejtë në bashkëpunim me Policinë e Vlorës dhe sektorin e krimeve kryen kontrolle të befasishme në Vlorë, në disa segmente rrugore dhe banesa. Policia ka pasur dyshime për fshehjen e personave me rrezikshmëri të lartë në banesa dhe automjete që qarkullojnë me xhama të zinj.
©️zërionline
