Dy të rinj janë arrestuar dhe 5 të mitur janë vënë nën hetim për përplasjen masive një ditë më parë para derës së shkollës së Gjuhëve të Huaja “Shejnaze Juka” në Shkodër. Policia ka arrestuar një 24-vjeçar Klevin Thepi dhe një 19-vjeçar Doronesto Kulla. Ndërsa 5 të miturit e vënë në hetim, 4 prej tyre janë 17 vjeç dhe njëri 16 vjeç.
“Specialistët për Hetimin e Krimeve të Komisariatit të Policisë Shkodër arrestuan shtetasit K. Th., 24 vjeç, dhe D. K., 19 vjeç, dhe filluan procedimin penal për pesë shtetas të mitur (4 prej tyre 17-vjeçarë dhe një 16-vjeçar). Këta shtetas, në rrugë, në lagjen “Kongresi i Përmetit”, për motive të dobëta, janë konfliktuar fizikisht me njëri-tjetrin dhe si pasojë, kanë pësuar dëmtime të lehta dy shtetas të mitur 17-vjeçarë”, njoftoi Policia.
Rrethanat e motivet e konflikt ende nuk janë sqaruar. Policia e Shkodrës në njoftimin e ndarë për mediat thonë se sherri ka ndodhur për shkaqe banale. Sherri ndodhi përpara shkollës rreth orës 11:10 në lagjen në lagjen “Kongresi i Përmetit” kur nxënësit duhet të ishin në mësim. Report Tv solli edhe pamjet e kamerave të sigurisë ku fillimisht dallohen tre nxënës që vijnë nga rrugica dhe drejtohen për te porta e shkollës. Nga pas i ndjekin një grup djemsh, dhe aty për aty përleshen e godasin njëri-tjetrin me grushte e sende të forta. Dy të plagosurit janë vëllezër dhe mësojnë në shkollën “Shejnaze Juka”. Ata ndodhen jashtë rrezikut për jetën.
©️zërionline
