Nga një novelë “thellësisht atmosferike” te një debutim “virtuoz”, këta janë librat më të mirë artistikë të vitit, sipas gazetarëve të BBC-së.
The Director – Daniel Kehlmann
Ky roman historik pjesërisht i trilluar nga shkrimtari dhe dramaturgu i njohur gjerman Daniel Kehlmann trajton temat e artit, pushtetit dhe bashkëfajësisë përmes jetës komplekse të një prej regjisorëve më të mëdhenj austriakë të epokës së Vajmarit, GW Pabst. Ai i shpëton regjimit nazist duke shkuar në Los Anxhelos, por nuk arrin sukses në Epokën e Artë të Hollivudit (Kehlmann imagjinon se ai injorohet nga Greta Garbo dhe Louise Brooks, aktoret që ai vetë i zbuloi). Pas kthimit në atdhe, Pabst punësohet nga Goebbels për të realizuar filma për Ministrinë e Propagandës së Rajhut. “Thelbi i The Director është pyetja nëse kompromisi i Pabstit vjen nga dobësia apo nga domosdoshmëria”, shkruan London Review of Books. The New York Times e quan librin “një performancë të mrekullueshme – elastike, tronditëse dhe me humor të zi, të përkthyer rrjedhshëm dhe plotësisht bindëse”.
Big Kiss, Bye-Bye – Claire-Louise Bennett
Një grua që ka lënë qytetin për thellësinë e fshatit jeton në një gjendje pezull, e përndjekur nga kujtimet e asaj që ka lënë pas. Një letër e papritur nga një njohje e vjetër çliron një lumë kujtimesh për dashuri të mëparshme, që përfaqësojnë njëkohësisht liri dhe sfidë për identitetin e saj. Romani pyet çfarë do të thotë të lidhesh plotësisht me dikë dhe si duhet të mësojmë ta lëmë të shkojë. TLS e quan Bennett “priftëreshë të izolimit”, ndërsa LRB vlerëson prozën e saj si “shkëlqyese, neo-baroke” dhe një shenjë të “modernizmit të ri”.
Endling – Maria Reva
Vendosur në Ukrainë në vitin 2022, romani ndjek tre gra që punojnë për një biznes kanadez “turnesh romantike”, që u ofron burrave perëndimorë nuse me porosi nga Ukraina. Një shkencëtare, dy motra dhe një kërmill i rrezikuar zhdukjeje nisen në një udhëtim të çmendur, ndërsa vendi ndodhet në prag lufte. Debutimi i Revës, i nominuar për Booker, është cilësuar nga The Guardian si “i shkathët dhe formalisht novator”, dhe nga NPR si “virtuoz”.
What We Can Know – Ian McEwan
Romani i 18-të i McEwan-it rrëfen dy histori paralele. Në vitin 2014, një poet lexon një poemë tronditëse për dështimet morale të elitës përballë katastrofës klimatike. Në vitin 2119, një studiues kërkon gjurmët e asaj poezie të humbur dhe zbulon një histori dashurie dhe krimi. The New York Times e quan librin “të guximshëm dhe plot energji”, ndërsa Irish Independent e cilëson si një meditim të thellë mbi artin, kujtesën dhe trashëgiminë.
Seascraper – Benjamin Wood
Një novelë e shkurtër, e vendosur në një qytet bregdetar imagjinar në veri të Britanisë. Thomas Flett kalon ditët duke mbledhur karkaleca, ndërsa ëndërron të bëhet muzikant. Mbërritja e një amerikani karizmatik trazon jetën e tij. The Guardian shkruan se romani është “aq atmosferik sa pothuajse ndien shijen e kripës së detit”.
Will There Ever Be Another You – Patricia Lockwood
Një shkrimtare përballet me shpërbërjen e jetës dhe marrëdhënieve të saj teksa zhvillon një sëmundje kronike. Narrativa e fragmentuar eksploron identitetin, dhimbjen dhe mbijetesën. Vulture e quan librin “të bukur dhe bujar në humor”.
Helm – Sarah Hall
Një roman historik “cli-fi”, i ndërtuar rreth erës së vetme të emërtuar në Britani – Helm – që fryn në Cumbria. Hall ndërthur historinë e përpjekjeve njerëzore për të kontrolluar natyrën me kërkimet e një klimatologeje bashkëkohore. FT e përshkruan si “të gjallë, të egër dhe të lirë”.
Good and Evil and Other Stories – Samanta Schweblin
Një përmbledhje tregimesh shqetësuese, ku momente të zakonshme kthehen papritur në ankth. The Guardian vlerëson qartësinë dhe drejtpërdrejtësinë e gjuhës së autores.
Flashlight – Susan Choi
Një vajzë 10-vjeçare gjendet në një plazh në Japoni, ndërsa babai i saj rezulton i zhdukur. Historia shtrihet në kontinente dhe breza, duke eksploruar identitetin, racën dhe përkatësinë kombëtare. I përzgjedhur për Booker, romani cilësohet si “epik dhe elegjiak”.
Katabasis – R.F. Kuang
Një roman dark academik/fantazi, ku “universiteti është ferr”. Një studente pasuniversitare zbret fjalë për fjalë në botën e nëndheshme për të ringjallur profesorin e saj. The Guardian flet për “kënaqësinë heretike” të romanit.
Bring the House Down – Charlotte Runcie
Një debutim që trajton marrëdhënien mes artistit dhe kritikut, zemërimin femëror dhe kulturën e anulimit, në sfondin e Festivalit Fringe në Edinburg.
The Loneliness of Sonia and Sunny – Kiran Desai
Pas gati 20 vitesh, Desai rikthehet me një roman të gjerë mbi dashurinë, familjen, identitetin dhe historinë postkoloniale. The New York Times e quan “shoqëri më të mirë se njerëzit e jetës reale”.
Bad Bad Girl – Gish Jen
Një përzierje romani dhe kujtimesh, që rishpik jetën e nënës së autores nga Shangai i viteve ’30 deri në Nju Jork. LA Times e cilëson librin “të pasur dhe njerëzor”.
Dream Count – Chimamanda Ngozi Adichie
Romani i ri, pas më shumë se një dekade, ndjek jetët e tre grave nigeriane dhe miqësinë e tyre. The Observer e quan “ia vlen pritja”.
We Do Not Part – Han Kang
Një roman që zbeh kufirin mes ëndrrës dhe realitetit, duke zbuluar një kapitull të dhunshëm të harruar të historisë koreane. LA Times: “i mrekullueshëm dhe thellësisht shqetësues”.
Stag Dance – Torrey Peters
Një përmbledhje tregimesh që lëvizin nga romantikja te distopia dhe historia, me premisa të guximshme dhe një stil plot lojë.
Theft – Abdulrazak Gurnah
Një roman formimi në Afrikën Lindore postkoloniale, që eksploron miqësinë dhe tradhtinë. The Economist vlerëson maturinë dhe kontrollin e rrëfimit.
Universality – Natasha Brown
Një satirë mbi politikën e identitetit, cancel culture dhe botën e medias. New Statesman: “shumë gazmor dhe therës”.
The Names – Florence Knapp
Një debutim që ndan narrativën në tre fate të ndryshme, sipas emrit që i vihet një foshnjeje. Kritika e quan një eksperiment të guximshëm dhe prekës.
The Emperor of Gladness – Ocean Vuong
Romani i dytë i Vuong-ut ndjek rritjen e një të riu homoseksual në SHBA-në rurale, mes miqësisë dhe dhimbjes. Observer: një panoramë sociale e ndërtuar me ndjeshmëri.
Eden’s Shore – Oisín Fagan
Një epikë detare brutale e shekullit XVIII, që përshkruan me humor të zi dhunën e tregtisë së skllevërve dhe idealizmin utopik.
Dream State – Eric Puchner
Një sagë familjare shumëbreznore, e vendosur në një Montana imagjinare që po ngrohet nga ndryshimet klimatike. Oprah Winfrey e përzgjodhi për klubin e saj të librit.
The Dream Hotel – Laila Lalami
Një roman spekulativ për mbikëqyrjen teknologjike, ku ëndrrat përdoren si prova rreziku. The Economist e quan “rrënqethës dhe bindës”.
Confessions – Catherine Airey
Një debutim i fuqishëm që ndjek tre breza grash, mes SHBA-së dhe Irlandës, duke eksploruar trashëgiminë e dhimbjes dhe çlirimit.
Flesh – David Szalay
Fitues i Booker Prize 2025, romani ndjek jetën e një burri nga adoleshenca deri në elitën londineze, me një stil minimalist dhe thellësisht reflektues. Observer: “një kryevepër”.
©️zërionline
