Nën reshje të dendura shiu, banorët e disa fshatrave protestuan ditën e sotme pranë rrugës së fshatit Gramzë, duke bllokuar për rreth një orë qarkullimin e automjeteve.
Protestuesit ndaluan lëvizjen në segmentin që lidh autostradën Thumanë–Kashar me aksin e vjetër Thumanë–Fushë Krujë. Sipas tyre, një pjesë prej rreth 500 metrash e kësaj rruge ndodhet në gjendje të amortizuar dhe problematike, duke vështirësuar lëvizjen e mjeteve, sidomos gjatë motit me reshje.
Banorët shprehen se, pavarësisht kërkesave të vazhdueshme, deri më tani nuk është ndërhyrë me investime konkrete për rehabilitimin e këtij segmenti. Ata theksojnë se situata është përkeqësuar me kalimin e kohës, ndërsa balta dhe gropat e shumta e bëjnë rrugën pothuajse të pakalueshme në ditë me shi.
Pas një ore bllokimi, protesta u mbyll pa incidente, por banorët paralajmëruan se nëse nuk do të ketë reagim nga institucionet përgjegjëse, do të rikthehen me forma të tjera proteste në ditët në vijim.
©️zërionline
