Ndahey nga jeta në moshën 79-vjeçare aktori dhe humoristi i njohur vlonjat, Mane Lumani. Ai u shua në ambientet e Spitalit Rajonal të Vlorës, ku prej më shumë se dy muajsh qëndronte i shtruar, për shkak të një sëmundjeje të rëndë në mushkëri dhe në zemër.
Lajmi për ndarjen e tij nga jeta ka tronditur familjarët, miqtë dhe mbarë komunitetin artistik të qytetit bregdetar, ku ai ishte një figurë e dashur dhe e respektuar. Ishte i martuar dhe baba i katër fëmijëve.
Prej dekadash ai ishte një nga parodistët më të spikatur të Vlorës, duke spikatur për mimikën karakteristike, humorin plot finesë dhe aftësinë për të trajtuar me elegancë situata të përditshme përmes satirës. Interpretimet e tij u kthyen në pjesë të pandashme të aktiviteteve artistike të qytetit, duke fituar zemrat e publikut vlonjat dhe më gjerë.
Kontributi i tij në jetën kulturore të Vlorës konsiderohet i vyer, pasi përmes artit të humorit ai solli buzëqeshje, reflektim dhe emocione ndër breza.
Së bashku me Agron Hoxhën, Afrim Agalliun dhe Muhamet Likën, Mane Lumani krijoi një stil të veçantë të humorit shqiptar.
Paroditë e tyre plot satirë dhe ironi ishin edhe një kritikë ndaj shoqërisë dhe politikës.
©️zërionline
