Autoriteti Kombëtar i Ushqimit (AKU) mësohet se ka pezulluar aktivitetin e një subjekti tregtar në Tiranë, pas konstatimit të shkeljeve të rënda të standardeve higjieno-sanitare gjatë një kontrolli të ushtruar në ambientet e tij.
Gjatë inspektimit një javë më parë, autoritetet sekuestruan një sasi prej 738 kilogramësh fileto dhe gjoks pule, të cilat rezultuan të trajtuara dhe të ruajtura në kushte të papërshtatshme. Sipas verifikimeve, produkti ishte vendosur drejtpërdrejt në tokë gjatë proceseve të ngrirjes dhe shkrirjes, duke rritur ndjeshëm rrezikun për ndotje.
Po ashtu, mjediset e ruajtjes së mishit paraqisnin probleme serioze higjienike, përfshirë praninë e mykut dhe ndryshkut, që përbën një kërcënim të drejtpërdrejtë për sigurinë ushqimore dhe shëndetin e konsumatorëve.
AKU vendosi pezullimin e aktivitetit të subjektit deri në përmbushjen e plotë të kushteve të kërkuara ligjore. Ndërkohë, e gjithë sasia e mishit të sekuestruar është dërguar për asgjësim.
Respektimi rigoroz i standardeve të sigurisë ushqimore është detyrim ndaj njerezve, ndaj kontrollet duhet të vijojnë me intensitet për të garantuar mbrojtjen e konsumatorëve.
©️zërionline
