Pasiguri në hapësirat urbane, një ngjarje e rëndë, që për pak sa nuk përfundoi tragjikisht, u regjistrua në zonën e Lungomares në Vlorë. Një qen i racës pitbull ka sulmuar një fëmijë rreth 4 vjeç.
E mitura pësoi plagë në kokë dhe u transportua me urgjencë drejt spitalit për ndihmë mjekësore. Sipas informacionevevendore, në momentin e sulmit ajo ndodhej nën kujdesin e gjyshërve.
Vendimtare ka qenë ndërhyrja e një qytetari që ndodhej pranë, Sejko Veliu, i cili reagoi menjëherë duke neutralizuar qenin dhe duke shmangur një pasojë edhe më të rëndë.
“Vajza ishte me gjyshin dhe gjyshen. Erdhi qeni dhe e mbërtheu në kokë. E kapa qenin dhe e lidha me zinxhir. Fëmija ishte rreth 4 vjeçe, erdhi ambulanca dhe e dërguan në spital”, rrëfeu ai.
Pas transportimit në Spitali Rajonal i Vlorës, e mitura iu nënshtrua ekzaminimeve mjekësore. Sipas bluzave të bardha, radiografia nuk ka evidentuar dëmtime serioze, por vetëm lëndime sipërfaqësore në lëkurën e kokës.
Aktualisht, 4-vjeçarja po merr trajtim spitalor dhe gjendja e saj paraqitet e stabilizuar. Ndërkohë, nëna e saj është shprehur se familja vijon të jetë e shqetësuar dhe në pasiguri për situatën.
Ngjarja rikthen edhe njëherë vëmendjen te siguria në hapësirat publike dhe kontrolli i kafshëve të rrezikshme, veçanërisht në zonat e frekuentuara nga familjarë dhe fëmijë.
©️zërionline
