Pasditja e së premtes në Durrës, ashtu si në çdo zonë që ka komunitet ortodoks, solli një atmosferë përkushtimi dhe reflektimi, teksa besimtarët ortodoksë morën pjesë në ceremoninë e shenjtë të Epitafit, në ditën e njohur si e Premtja e Zezë, një nga ditët më të rëndësishme të kalendarit liturgjik, para Pashkës, festës së Ringjalljes.
Pas shërbesës dhe ritualit në kishën Apostull Pavli dhe Shën Asti, ku qindra besimtarë u mblodhën për të përkujtuar vuajtjet dhe kryqëzimin e Krishtit, përmes ritualit simbolik të shoqërimit të Epitafit, i cili përfaqëson trupin e Krishtit që vdiq në kryq. Me qirinj në duar dhe në heshtje, ata kanë ndjekur procesionin solemn, që përshkon rrugët kryesore të Durrësit përreth kishës.
Kjo ceremoni, e mbushur me simbolikë dhe emocione, mbetet një moment kulmor për besimtarët, duke i ftuar ata në reflektim mbi sakrificën, dhimbjen dhe shpresën që sjell ringjallja. Në Durrës, si çdo vit, pjesëmarrja e lartë dhe përkushtimi i besimtarëve dëshmon rëndësinë që kjo ditë ka në jetën shpirtërore të komunitetit ortodoks.
©️zërionline
