Një konflikt banal përfundoi me plagosje me thikë në Durrës. Policia arrestoi autorin e dyshuar, ndërsa i plagosuri ndodhet në spital nën kujdesin e mjekëve. Ngjarja ndodhi pranë stadiumit “Niko Dovana” në një pikë saldimi mjetesh metalike.
Një konflikt i shpejtë për motive të dobëta, konkretisht për llamarina, përfundoi me plagosjen e një 60-vjeçari. Shtetasi R. Ll., rreth 45 vjeç, i njohur nga policia për probleme të shëndetit mendor, dyshohet se goditi me thikë 60-vjeçarin Vangjel Parangoni i cili po punonte si çdo ditë në biznesin e tij.
Policia mbërriti në vendngjarje brenda pak minutash nga marrja e njoftimit dhe ndaloi autorin e dyshuar në afërsi të ish-dispancerisë, duke e shoqëruar në komisariat për veprime të mëtejshme. I plagosuri u dërgua menjëherë në spital, ku po merr ndihmën e nevojshme mjekësore. Hetimet po vazhdojnë për të dokumentuar plotësisht ngjarjen.
@zërionline
