Durrësi ka kurorëzuar më të mirët e bukurisë gjatë spektaklit tradicional “Miss & Mister Durrësi”, që u zhvillua mbrëmjen e 10 prillit në qytetin bregdetar, duke sjellë në skenë energjinë dhe elegancën e të rinjve konkurrues.
Juria, e përbërë nga emra të njohur të jetës publike, përzgjodhi 16-vjeçaren Matea Salillari, nxënëse e gjimnazit “Naim Frashëri”, si “Miss Durrësi 2026”, ndërsa titulli “Mister Durrësi” iu dha 17-vjeçarit Noel Ballanca, nxënës i gjimnazit “Rilindja”. Të përzgjedhur mes duartrokitjeve të publikut dhe vlerësimeve të jurisë, ata do të përfaqësojnë Durrësin në aktivitete të ardhshme kombëtare të bukurisë.
Spektakli përcolli freskinë e moshës dhe vlerat që arti dhe bukuria mbartin në qytetin bregdetar, duke e kthyer këtë event në një traditë të rëndësishme rinore. Konkurrentët sfiluan me veshje të ndryshme, përfshirë kostume elegante, tradicionale dhe plazhi, duke shfaqur jo vetëm paraqitjen fizike, por edhe vetëbesimin dhe stilin personal.
Përveç paraqitjes në skenë, të rinjtë iu përgjigjën edhe pyetjeve të jurisë, duke dëshmuar aftësitë e tyre në komunikim dhe formimin intelektual, si pjesë e vlerësimit përtej pamjes së jashtme.
Spektakli organizohet çdo vit me përkushtim nga shkrimtarja dhe aktivistja Myzejen Konduri, duke synuar të promovojë talentin dhe potencialin e të rinjve të Durrësit, si dhe të ruajë një traditë tashmë të konsoliduar në jetën kulturore të qytetit.
L. B.
©️zërionline
