Një 49-vjeçar nga Durrësi është arrestuar në flagrancë në Pikën e Kontrollit Kufitar të Portit të Durrësit, pasi u kap me mallra të dyshuara kontrabandë, para të padeklaruara dhe sende pa dokumentacion shoqërues.
Specialistët për Hetimin e Krimeve në Drejtorinë Vendore për Kufirin dhe Migracionin Durrës, gjatë kontrollit në dalje, ushtruan kontroll fizik ndaj shtetasit O. T., si dhe në kamionin që ai drejtonte. Gjatë kontrollit, shërbimet e Policisë Kufitare gjetën një pajisje elektronike të tipit përforcues valësh, një shumë të konsiderueshme parash të padeklaruara dhe pa dokumentacion përkatës.
Në cilësinë e provës materiale u sekuestruan pajisja elektronike, shuma monetare, kamioni dhe telefoni celular i të arrestuarit.
49-vjeçari akuzohet për veprat penale “Kontrabanda me mallra të tjera” dhe “Mosdeklarimi në kufi i të hollave dhe sendeve me vlerë”, ndërsa materialet procedurale i janë referuar Prokurorisë për veprime të mëtejshme.
©️zërionline
