Pak orë pas arrestimit të dy personave për zhvatje në një vendparkim pa pagesë në Durrës, një tjetër person tentoi të përfitojë e të marrë para në parkimin pranë pishinës olimpike. Ai u shfaq që në orët e mëngjesit në parkimin pranë pishinës, me stilolaps dhe fletore në dorë, gati për të përfituar nga parkimi i radhës i automjeteve.
Kur e pyes nëse ka frikë se mund të arrestohet, më thotë jo, pa qenë i vetëdijshëm se paraardhësit e tij tashmë janë në pranga. Ai po e shijon faktin se territori është i lirë dhe mund të bëjë disa para.
I martuar dhe me fëmijë, vite më parë ka ardhur nga Kosova për të jetuar në Durrës. Përballet shpesh me policët, por justifikohet duke thënë se nuk u merr para për parkim, por thjesht lyp, pa i detyruar. Deri tani, kështu ia ka hedhur.
Ai largohet për të orientuar parkimin e një automjeti që sapo ka hyrë në shesh. Më pas, takon dikë dhe duket se e konfirmon. Më në fund, kupton që dy personat e tjerë, as të parët e as të fundit në Durrës, që më parë kërkonin para padrejtësisht nga qytetarët për parkim, janë kapur nga policia. Kjo e tremb dhe vendos të largohet për pak kohë. Nuk dëshiron të përfundojë në të njëjtën situatë, ndërsa në shtëpi e pret familja – fëmijët që kanë nevojë për ushqim dhe veshmbathje dhe nuk duan të dinë për poshtërimin, zhvatjen e qytetarëve a për rrezikun me të cilin përballet ai për të siguruar paratë e përditshme.
@zërionline
