Në vijim të informacioneve të siguruara nga strukturat operative të Drejtoria e Përgjithshme e Burgjeve dhe pas analizës së riskut, u ndërmor një aksion i befasishëm kontrolli në IEVP Durrës.
Kontrolli u zhvillua në orët e para të mëngjesit, me pjesëmarrjen e Forcave Speciale të DPB. Gjatë operacionit u ushtrua kontroll në ambientet e brendshme dhe të jashtme të institucionit.
Sipas të dhënave zyrtare, gjatë kontrollit u sekuestruan tre celularë tip “iPhone”, të ndezur dhe funksionalë. Njëri prej tyre u gjet në posedim të të paraburgosurit me iniciale B.G., ndërsa dy të tjerë, së bashku me një palë kufje “bluetooth”, u konstatuan pa autor në ambientet e jashtme, në zonën e brezit të butë.
Burime nga ky burg bënë me dije se të paraburgosurit e njohur që mbahen në të nuk rezultuan problematikë në këtë rast.
Menjëherë pas konstatimit të rastit, u veçua i paraburgosuri B.G., u hartua raporti i incidentit dhe u mbajt procesverbali i bllokimit të sendeve të ndaluara. Materialet i janë referuar Specialistit të SHKB për veprime të mëtejshme hetimore.
Ky aksion vlerësohet si pjesë e masave për forcimin e sigurisë në institucionet penitenciare. Sipas autoriteteve, kontrollet do të vijojnë me intensitet të lartë në të gjitha IEVP-të në rang vendi, në kuadër të politikës së tolerancës zero ndaj shkeljeve.
©️zërionline
