Pas tragjedisë me dy fëmijë në Durrës, Policia paralajmëron ndëshkime të ashpra për shoferët
Aksidenti tragjik në Durrës, ku humbën jetën dy fëmijë dhe u plagos një tjetër, ka nxitur reagim të menjëhershëm nga strukturat e rendit. Në një dalje për mediat, drejtori i Departamentit për Rendin dhe Sigurinë Publike, Dhimitraq Ziu, paralajmëroi masa të reja dhe më të ashpra për të frenuar shkeljet që po kthehen në burim aksidentesh fatale.
Sipas tij, fokusi kryesor do të jetë parandalimi i sjelljeve agresive në rrugë dhe rritja e kontrollit përmes teknologjisë. Në akset nacionale, policia nuk do të ndalojë më automjetet pa arsye, por monitorimi do të kryhet me pajisje inteligjente dhe patrulla të lëvizshme. Çdo shkelje do të regjistrohet dhe gjobat do të pasqyrohen në kohë reale në e-Albania.
Patrullat do të ndërhyjnë vetëm në raste flagrante, si shpejtësi ekstreme, parakalime të rrezikshme apo sjellje agresive që rrezikojnë jetën e përdoruesve të rrugës.
Shifrat e publikuara nga policia tregojnë përmasa shqetësuese të fenomenit:
- 82,100 drejtues mjetesh janë ndëshkuar për tejkalim shpejtësie
- 27,000 për parakalime të gabuara
- rreth 60,000 për përdorim celulari, mosvendosje të rripit apo mungesë kaskë
- 1,009 drejtues janë arrestuar për drejtim në gjendje të dehur ose pa leje
- 815 shoferë kanë humbur të gjitha pikët e patentës
Ndërkohë, 33% e viktimave në aksidente rezultojnë të jenë këmbësorë, drejtues biçikletash apo motomjetesh, që tregon rrezikun e lartë për kategoritë më të pambrojtura në rrugë.
Në zonat urbane, kontrollet do të intensifikohen me testime alkooli, monitorim shpejtësie, ndëshkime për mosdhënie përparësie ndaj këmbësorëve dhe goditje të fortë ndaj parkimeve të gabuara, përfshirë përdorimin e mjeteve ngritëse.
Autoritetet theksojnë se, pavarësisht një përmirësimi të lehtë krahasuar me vitin e kaluar, shkaqet kryesore të aksidenteve mbeten të njëjtat: shpejtësia dhe sjellja e papërgjegjshme në rrugë.
Policia Rrugore apelon për respektim rigoroz të rregullave, duke paralajmëruar se çdo shkelje apo sjellje agresive do të ndëshkohet maksimalisht, me qëllimin e vetëm: mbrojtjen e jetës.
©️zërionline
