Nën muret shekullore të Torrës Veneciane në Durrës, poezia mori frymë, tingull dhe emocion gjatë mbrëmjes letrare “Fëmijë të Dritës”, kushtuar krijimtarisë së autorit Enton Bido. Në një atmosferë të mbushur me ndjeshmëri artistike dhe dialog kulturor, aktiviteti bashkoi dashamirës të letërsisë, krijues dhe qytetarë, duke e kthyer këtë takim në një festë të shkurtër të fjalës dhe shpirtit krijues. Përmes interpretimit të aktores së teatrit të Durrësit Mimoza Marjanaku, vargjet e autorit prekën pjesëmarrësit me mesazhet dhe ndjeshmërinë e tyre.
Poezia e Enton Bidos, e vlerësuar për ndjeshmërinë dhe frymën bashkëkohore, erdhi pranë publikut përmes interpretimit emocional të aktores së teatrit profesionist të Durrësit Mimoza Marjanaku, e cila solli me mjeshtëri vargjet dhe mesazhet e autorit. Leximet poetike dhe bashkëbisedimi me të pranishmit krijuan një klimë të ngrohtë emocionale, ku arti u bë urë komunikimi mes autorit dhe publikut.
Aktiviteti u organizua si bashkëpunim nga disa institucione publike të trashëgimisë sonë kulturore dhe artit të fjalës, mes të cilave Biblioteka Publike e Durrësit dhe Qendra Muzeore, me synimin për të promovuar letërsinë, dialogun kulturor dhe mbështetjen e krijimtarisë artistike në qytetin e Durrësit.
Prej shumë vitesh pjesë e jetës kulturore të qytetit, Enton Bido njihet jo vetëm si autor i disa librave dhe përkthimeve, por edhe si specialist i përkushtuar pranë Bibliotekës së Durrësit, duke kontribuar vazhdimisht në pasurimin e jetës letrare dhe kulturore të qytetit.
“Fëmijë të Dritës”, së bashku me organizime të tjera të autorëve durrsakë, dëshmojnë se Durrësi mbetet një hapësirë ku arti, poezia dhe kultura vazhdojnë të gjejnë zë dhe frymëzim.
©️zërionline
