Në kuadër të Ditës së Europës, mbrëmjen e së shtunës, sheshi “Italia” në Tiranë u shndërrua në një skenë të madhe artistike, ku muzika, kujtesa dhe emocionet u ndërthurën në koncertin “Morricone ishte im at”.
Nën dirigjimin e Andrea Morricone, djalit të kompozitorit legjendar Ennio Morricone, publiku shqiptar pati mundësinë të përjetojë nga afër disa prej veprave dhe kolonave zanore më të njohura të mjeshtrit italian. Ato kanë shoqëruar historinë e kinematografisë botërore për dekada me radhë duke ngritur vlerat e shumë filmave në një tjetër nivel.
Koncerti, nën drejtimin artistik të regjisores Anila Varfi, erdhi si një udhëtim artistik dhe emocional në jetën dhe krijimtarinë e Ennio Morricones, ku muzika u ndërthur me rrëfimet personale të djalit tjetër të kompozitorit, Marco Morricone, i cili përmes fjalës solli kujtime, episode dhe detaje të panjohura nga jeta e kompozitorit të madh italian.
“Unë e shihja tim atë fshehurazi në studion e tij teksa ai krijonte magji mbi pentagram. Isha vetëm 5 vjeç kur e admiroja atë, të ulur dhe të palëvizur si një gjigand që po shpikte diçka, edhe pse nuk e kuptoja çfarë”, tha djali i Ennio Morricone, Marco.
Në skenë u ngjitën edhe artistët me famë botërore, baritoni Alessio Quaresima Escobar dhe sopranoja Vittoriana De Amicis të cilët përmes intepretimit të veçantë artistik, i dhanë koncertit një dimension ndërkombëtar.
Atmosfera e krijuar në shesh u shoqërua nga emocione të forta dhe duartrokitje të vazhdueshme të publikut, i cili është i familjarizuar me muzikën e krijuar nga Morricone edhe përmes disa prej filmave më të ndjekur ndër vite.
Koncertin e ndoqën edhe krerët më të lartë të shtetit shqiptar, mes tyre Kryeministri Edi Rama, Presidenti Bajram Begaj, ambasadori i Bashkimit Europian në Tiranë, Silvio Gonzato, si dhe personalitete të shumta të jetës publike, kulturore dhe artistike në vend.
Koncerti “Morricone ishte im atë”, mbështetur financiarisht nga Qeveria shqiptare dhe ambasada italiane, u mirëprit nga publiku dhe konsiderohet si një nga aktivitetet më të rëndësishme artistike të organizuara në Tiranë.
©️zërionline
