Rreth 30 skafistë nga Ksamili kanë protestuar ditën e sotme përpara Bashkisë së Sarandës, duke kërkuar përcaktimin urgjent të vendbazimit për skafet e tyre, këtë sezon turistik.
Sipas tyre, pavarësisht se sezoni ka nisur dhe fluksi i turistëve në zonë është në rritje, ende nuk është marrë një vendim për hapësirën ku duhet të ankorohen mjetet lundruese dhe kjo po krijon pasiguri për aktivitetin e tyre.
“Jemi taksapagues, të licencuar dhe të rregullt me të gjitha detyrimet ligjore, por ende nuk na është përcaktuar vendi ku duhet të lejmë skafet. Kjo është puna me të cilën mbajmë familjet tona. Kërkesa duhej zgjidhur më herët, pasi jemi në prag sezoni. Nuk jemi dakord të zhvendosemi larg qendrës, aty ku kemi operuar prej vitesh”, u shprehën protestuesit.
Ata theksojnë se mungesa e një vendimi të qartë e në kohë rrezikon jo vetëm të ardhurat e dhjetëra familjeve që varen nga turizmi detar, por edhe ecurinë e sezonit turistik në Ksamil. Sipas tyre, vonesat mund të sjellin kaos në menaxhimin e skafeve, humbje ekonomike dhe pakënaqësi te turistët.
Skafistët i kanë bërë thirrje institucioneve përgjegjëse që të marrin një vendim të menjëhershëm, në mënyrë që të shmangen problematikat gjatë kulmit të sezonit veror.
©ZëriOnline
