Procesi i votimit për referendumin e votëbesimit në Partinë Demokratike po vijon i qetë këtë të shtunë në qarkun e Durrësit. Në pesë orët e para të procesit, pjesëmarrja e anëtarësisë varion nga 17 deri në 20 për qind, sipas të dhënave nga degët lokale të PD-së.
Në qytetin e Durrësit, votimi po zhvillohet në selinë e degës së partisë. Në degën nr. 1 të PD-së, që mbulon qytetin, janë të regjistruar 2700 anëtarë me të drejtë vote.
Ndërkohë, dega nr. 2, e cila përfshin njësitë administrative të Bashkisë Durrës, ka 813 anëtarë dhe procesi i votimit po mbahet në një ambient privat te Kthesa e Ariut, në Sukth.
Që prej hapjes së kutive të votimit, anëtarët e PD-së i janë drejtuar qendrave për të rikonfirmuar në krye të partisë liderin historik Sali Berisha. Megjithatë, mes votuesve ka edhe anëtarë që janë shprehur kundër këtij referendumi votëbesimi.
Në total, degët e Durrësit dhe Shijakut numërojnë rreth 4300 anëtarë, ndërsa dega e Krujës ka deklaruar 2200 anëtarë në listat e saj. Procesi pritet të vijojë gjatë gjithë ditës, ndërsa drejtuesit lokalë po bëjnë thirrje për pjesëmarrje sa më të lartë të anëtarësisë.
©ZëriOnline
