Dy ngjarje të rënda tronditën këtë të hënë qytetin e Durrësit, ku një burrë 57-vjeçar dhe një grua 46-vjeçare i dhanë fund jetës në rrethana tragjike. Pas çdo lajmi të tillë fshihen histori personale, dhimbje të heshtura dhe beteja që shpesh zhvillohen larg syve të shoqërisë.
Sipas informacioneve policore, 46-vjeçarja që humbi jetën në lagjen 18 dyshohet se vuante nga depresioni. Ky detaj rikthen edhe një herë në vëmendje rëndësinë e shëndetit mendor dhe nevojën që problemet psikologjike të mos trajtohen me paragjykim apo indiferencë.
Depresioni nuk është thjesht një gjendje kalimtare mërzie. Sipas specialistëve, ai është një sëmundje që zgjat në kohë dhe mund ta çojë njeriun në izolim, humbje shprese dhe, në rastet më të rënda, në akte ekstreme. Fatkeqësisht, në shoqërinë tonë ende shumë persona hezitojnë të kërkojnë ndihmë profesionale, nga frika e gjykimit apo mungesa e mbështetjes.
Ngjarje të tilla nuk duhet të mbeten vetëm kronikë e zezë. Ato duhet të shërbejnë si thirrje për më shumë kujdes ndaj njerëzve pranë nesh, për më shumë vëmendje ndaj shenjave të depresionit, ankthit dhe vetmisë. Shpesh, një njeri që vuan nuk kërkon ndihmë me fjalë, por me heshtje, izolim apo ndryshim sjelljeje.
Në një kohë kur vështirësitë ekonomike, stresi dhe problemet sociale po rëndojnë gjithnjë e më shumë jetën, kujdesi për shëndetin mendor duhet të jetë prioritet, jo tabu. Familja, shoqëria dhe institucionet duhet të jenë më të kujdesshme dhe të luajnë një rol të rëndësishëm për të krijuar mbështetje dhe për të parandaluar tragjedi të tilla.
Ndonjëherë, një bisedë, një dëgjim i sinqertë apo një ndihmë në kohën e duhur dhe e vazhdueshme mund të shpëtojë një jetë.
L. B.
©ZëriOnline
