Policia e Tiranës ka zbardhur dinamikën e incidentit të ndodhur mëngjesin e së premtes pranë kthesës së Kamzës, ku një 38-vjeçar dyshohet se ka sulmuar një efektiv të Policisë Rrugore gjatë ushtrimit të detyrës.
Sipas njoftimit zyrtar, rreth orës 08:20, shtetasi Dorian Kaso 38 vjeç, i është afruar në mënyrë të menjëhershme punonjësit të policisë Loren Rama, i cili po menaxhonte trafikun rrugor, dhe i ka vendosur në fyt një mjet prerës (thikë).
Policia bën me dije se pas këtij veprimi, 38-vjeçari ka tentuar t’i marrë efektivit edhe armën e shërbimit. Megjithatë, ai është neutralizuar dhe vënë në pranga menjëherë nga shërbimet policore që ndodheshin në zonë.
Gjatë ndërhyrjes është sekuestruar edhe mjeti prerës i përdorur në incident.
Specialistët për Hetimin e Krimeve të Rënda ndaj Personit kanë arrestuar në flagrancë 38-vjeçarin për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”.
Materialet procedurale i janë referuar Prokurorisë së Tiranës, e cila do të vijojë me veprimet e mëtejshme hetimore.
“Specialistët për Hetimin e Krimeve të Rënda ndaj Personit arrestuan në flagrancë, për veprat penale “Vrasja e punonjësve të Policisë së Shtetit”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”, shtetasin D. K., 38 vjeç.
Më datë 05.06.2026, rreth orës 08:20, në afërsi të kthesës së Kamzës, 38-vjeçari në mënyrë të menjëhershme i ka vënë në fyt, mjetin prerës (thikë) që kishte me vete, një punonjësi të Policisë që ishte në krye të detyrës, duke menaxhuar trafikun rrugor.
Gjithashtu, 38-vjeçari ka tentuar t’i marrë efektivit, armën e shërbimit, por është neutralizuar dhe vënë menjëherë në pranga nga shërbimet e Policisë.”-thuhet në njoftimin e bluve të kryeqytetit.
©ZëriOnline
