Policia e Durrësit ka finalizuar me sukses një tjetër operacion të rëndësishëm në kuadër të planit operacional kombëtar “Tempulli”, i cili synon goditjen e veprimtarisë kriminale në fushën e narkotikëve. Operacioni i koduar “Last Dinner” çoi në arrestimin e dy të rinjve, 19-vjeçarë nga Shënavlashi, të cilët u kapën në flagrancë teksa po lëviznin drejt lokaleve të natës për të shpërndarë lëndë narkotike. Ata u kapën pranë stacionit të Trenit në Durrës.
Gjatë kontrollit në automjetin e tyre, shërbimet e policisë gjetën dhe sekuestruan dhjetëra doza kokainë të ndara gati për shitje. Sipas informacioneve të siguruara nga inteligjenca policore, të arrestuarit shpërndanin kokainë në lokalet e natës të frekuentuara masivisht nga të rinjtë gjatë sezonit të verës.
Ky arrestim vjen si pjesë e operacionit “Tempulli”, që nga nisja e të cilit dhjetëra persona janë vënë në pranga për shpërndarje narkotikësh pranë shkollave dhe në ambientet që frekuentohen nga të rinjtë. Shumë të tjerë janë shpallur në kërkim.
Ndërkaq një pjesë e të arrestuarve në kuadër të këtij operacioni hetohen në gjendje të lirë me vendim gjykate. Pavarësisht kësaj
Policia e Durrësit ka vijuar kontrollet dhe zbatimin e masave të rrepta për të luftuar këtë fenomen, duke forcuar praninë e saj në zonat e rrezikut.
zërionline
