Dogana e Durrësit, në bashkëpunim me strukturat e Policisë së Shtetit, ka bllokuar gjatë kontrolleve të ushtruara në Portin e Durrësit një sasi lënde narkotike të dyshuar si kokainë, katër gurë të çmuar të dyshuar si diamante, si dhe një aparaturë elektronike për detektimin e metaleve të çmuara.
Sipas informacionit zyrtar, gjatë kontrollit të një automjeti që kishte mbërritur me tragetin e linjës Ankona–Durrës, u konstatua një valixhe ku ndodhej aparatura detektuese së bashku me aksesorët përkatës.
Në një rast tjetër, gjatë kontrollit fizik të një shtetasi që udhëtonte me një automjet të ardhur nga Italia, u gjetën katër paketime transparente që përmbanin gurë të ngjashëm me diamantet.
Ndërkohë, në një automjet tjetër u zbulua një sasi e dyshuar lënde narkotike, e dyshuar si kokainë, e fshehur në një veshje të vendosur në kabinën e drejtuesit të mjetit.
Të gjitha rastet janë referuar pranë strukturave kompetente për vijimin e procedurave ligjore dhe hetimeve të mëtejshme.
©ZëriOnline
