Deputetja Marjana Koçeku ka njoftuar largimin e saj nga Partia Socialiste, duke bërë të ditur se do të vijojë mandatin në Kuvend si deputete e pavarur.
Përmes një statusi të publikuar në rrjetet sociale, Koçeku theksoi se vlerat dhe idealet e saj kanë mbetur të pandryshuara ndër vite, duke lënë të kuptohet se vendimi për t’u shkëputur nga forca politike me të cilën u zgjodh deputete lidhet pikërisht me këto parime.
“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”, shkruan Koçeku në reagimin e saj.
Marjana Koçeku ishte e para në listën e kandidatëve për deputetë të Partisë Socialiste në qarkun Shkodër në zgjedhjet e fundit, duke mbajtur një rol të rëndësishëm në përfaqësimin e kësaj force politike në zonë.
Megjithatë, mbetet ende e paqartë nëse largimi i saj është formalizuar zyrtarisht pranë strukturave të Partisë Socialiste dhe Kuvendit të Shqipërisë.
Vendimi i Koçekut pritet të ngjallë diskutime në skenën politike, ndërsa mbetet për t’u parë nëse ky hap do të pasohet nga zhvillime të tjera në raportin e saj me mazhorancën.
©ZëriOnline
