Një ngjarje e rëndë kriminale është shënuar mëngjesin e së hënës në zonën e Spaçit, në Mirditë. Rreth orës 07:00, në fshatin Shkorrët, përgjatë aksit rrugor Reps-Spaç, është gjetur i vrarë me armë zjarri një person brenda automjetit me të cilin po udhëtonte.
Viktima është identifikuar nga burime lokale policore si Valter Lleshi, rreth 45 vjeç. Sipas të dhënave paraprake, ai po lëvizte me një automjet tip “Toyota” në drejtim të vendit të punës kur është qëlluar për vdekje.
Lleshi raportohet se ishte shofer, punonjës i kompanisë që merret me nxjerrjen dhe përpunimin e bazaltit në zonë. Ngjarja merr një tjetër përmasë pasi rreth tre muaj më parë, në një prej makinerive të kësaj kompanie ishte vendosur lëndë plasëse, duke ngritur dyshime për konflikte apo interesa që lidhen me aktivitetin e saj.
Forcat e policisë dhe grupi hetimor kanë mbërritur në vendngjarje dhe kanë nisur hetimet për zbardhjen e plotë të rrethanave, identifikimin e autorëve dhe dokumentimin e motiveve që çuan në këtë krim të rëndë.
©ZëriOnline
