Pushues dhe banorë të zonës bregdetare në Kavajë e Durrës kanë ngritur shqetësime për mungesën e ujit të pijshëm në zonë. Ujësjellës Kanalizime, Rajoni Durrës, ka sqaruar se problemet në furnizimin me ujë nga Qerreti deri në Plepa, si dhe në qytetin e Kavajës, janë shkaktuar nga një ndërprerje e energjisë elektrike nga Operatori i Sistemit të Transmetimit (OST), i cili është angazhuar në riparimin e një defekti në linjën e tensionit të lartë 35 kV.
Ky defekt ka ndodhur si pasojë e një zjarri një ditë më parë në aksin Lushnje-Rrogozhinë, i cili ka dëmtuar linjën 35 kV që furnizon me energji elektrike stacionin e pompimit në Çermë të Lushnjës. Ky stacion është burimi kryesor i furnizimit me ujë për qytetin e Kavajës dhe zonën turistike nga Kavajë deri në Plepa.
Aktualisht, OST është duke punuar për riparimin e defektit dhe pritet që me kthimin e energjisë elektrike dhe rivënien në punë të stacionit të pompimit, furnizimi me ujë të rifillojë sipas grafikut të zakonshëm.
©️zërionline
