Hetimet për vrasjen e gazetarit italian Luigi Esposito, i njohur nga të gjithë si “Luca”, kanë shënuar një zhvillim të rëndësishëm ditën e djeshme. Karabinierët kanë arrestuar një 26-vjeçar tunizian, i identifikuar si Ridha Rahmoumi, i cili dyshohet se mund të jetë autor i krimit.
i riu, që në mediat italiane cilësohet si klandestin, pasi nuk i është dhënë leje qëndrimi dy vitet e fundit, u lokalizua brenda një banese fshati të braktisur në zonën e Ebolit, në provincën e Salernos, jo larg vendit ku u gjet i djegur në mjet Esposito më 19 korrik.
Gjatë kontrollit në banesën ku dyshohet se ishte fshehur, karabinierët kanë gjetur disa sende personale që i përkisnin viktimës, mes tyre edhe karta bankare, elementë që sipas hetuesve mund të ndihmojnë në rindërtimin e dinamikës së ngjarjes.
Dyshimet e para të pakonfirmuara hidhen mbi një takim me natyrë intime mes Esposito dhe Rahmoumi. Telefoni i viktimës është sekuestruar dhe po analizohet për të zbardhur kontaktet e fundit të gazetarit. E ndërsa hetimet vijojnë nga Prokuroria e Salernos, arrestimi i fundit ka ngritur sërish polemika në opinion mbi emigracionin e paligjshëm dhe orientimin seksual.
©ZëriOnline
