Në operacion është angazhuar një avion zjarrfikës “Air Tractor” nga Spanja. Avionin e ka sjellë kompania me të cilën qeveria ka lidhur kontratë për blerjen e tre avionëve të këtij tipi. Kjo është një periudhë testimi, pasi kontrata parashikon që avionët e rinj t’i bashkohen flotës ajrore në fund të dhjetorit.
Prej dy ditësh vijon beteja me flakët në Mallakastër, ku zjarri ka përfshirë rreth 15 hektarë sipërfaqe pyjore dhe rrezikon zonat e banuara.
Avioni zjarrfikës “Air Tractor AT-802 Fire Boss” ka kryer fluturimin e parë në vendin tonë, duke u angazhuar në operacionin për shuarjen e flakëve në fshatin Rriban. Avioni i përket kompanisë me të cilën qeveria ka lidhur kontratë për blerjen e tre avionëve të këtij tipi, të cilët pritet të mbërrijnë në fund të vitit.
Edhe pse kontrata parashikon dorëzimin e tyre në dhjetor, kompania ka sjellë avionin e parë për të nisur trajnimin e pilotëve shqiptarë për përdorimin e këtyre mjeteve. Aktualisht, operacionet po kryhen nga pilotët e kompanisë, të cilëve më pas do t’u bashkohen edhe pilotët shqiptarë.
Përmes një postimi në rrjetet sociale, kryeministri Edi Rama e cilësoi aktivizimin e avionit si një forcë shtesë në përballjen me zjarret e kësaj vere.
Në operacion janë angazhuar gjithashtu helikopterët e Forcës Ajrore dhe droni Bayraktar, i cili përdoret për zbulimin dhe monitorimin e vatrave të zjarrit.
Beteja me flakët në Rriban të Mallakastrës vijon prej dy ditësh. Gjatë natës, zjarri është përhapur drejt masivit pyjor të Lofkëndit dhe fshatit Ngraçan. Terreni i thyer, bimësia e dendur dhe era kanë vështirësuar ndërhyrjen nga toka. Banorët e evakuuar një ditë më parë janë rikthyer në banesat e tyre.
