Një zjarr i rënë rreth mesditës së së mërkurës në fshatin Penkovë, pjesë e Bashkisë së Selenicës, përfshiu një pikë grumbullimi automjetesh për pjesë këmbimi, duke shkaktuar dëme të mëdha materiale.
Si pasojë e flakëve, u dogjën dhjetëra automjete, ndërsa dëmet ekonomike janë të konsiderueshme. Në vendngjarje ndërhynë menjëherë forcat zjarrfikëse, të cilat punuan për të vënë situatën nën kontroll dhe për të parandaluar përhapjen e zjarrit në zonat përreth.
Shkaqet e zjarrit nuk janë përcaktuar ende. Autoritetet kanë nisur hetimet për të zbardhur rrethanat e ngjarjes.
Pronari i biznesit, Tomian Hysaj, deklaroi se dëmi ekonomik i shkaktuar nga zjarri arrin në rreth 35 milionë lekë të vjetra. Ai u bëri thirrje Bashkisë së Selenicës dhe institucioneve shtetërore që ta mbështesin për të përballuar humbjet.
Ndërkohë, shefi i Emergjencave Civile pranë Bashkisë së Selenicës, Arqile Kokalli, bëri të ditur se falë ndërhyrjes së koordinuar të zjarrfikësve nga Selenica, Vlora dhe Himara, flakët u lokalizuan në kohë, duke shmangur përhapjen e tyre në zona të tjera. Sipas tij, ekipet vijuan punën në terren deri në shuarjen e plotë të vatrave aktive dhe mbajtjen e situatës nën kontroll.
Fatmirësisht, nga zjarri nuk pati persona të lënduar dhe dëmet e regjistruara janë vetëm materiale. Hetimet vijojnë për të përcaktuar shkakun e zjarrit.
©ZëriOnline
