Situata nga zjarret në Krujë u përmirësua pas disa orësh betejë me flakët. Dy vatra mbeten ende aktive në Barabit dhe Abazë. Për shkak të situatës së vështirë me flakët, energjia elektrike u ndërpre në 5 lagje të Krujës. Pacientët e spitalit janë dërguar në Tiranë.
Pasi u duk se vendi më në fund ra disi në qetësi pas disa ditësh betejë me flakët, Kruja u përball me një situatë të vështirë nga zjarret. Një vatër e shkaktuar nga dora e njeriut mori përmasa të mëdha, duke iu afruar zonave të banuara dhe duke rrezikuar shtëpi e biznese.
Qindra banorë janë detyruar të lënë shtëpitë në zonat e Barabit dhe Llubanit ku situata ishte edhe më problematike. Flakët kërcënuan edhe Spitalin e Krujës, pasi një nga vatrat u afrua vetëm rreth 50 metra nga qendra spitalore. Për shkak të rrezikut, pacientët u evakuuan menjëherë dhe u dërguan drejt Tiranës.
Ndërkohë, në pranga është vënë autori i dyshuar i zjarrvënies, Qemal Berhami. Ai kishte ndezur barishtet pranë shtëpisë së tij, por zjarri doli jashtë kontrollit dhe u përhap, duke rrezikuar banorët e Krujës. Terreni i thepisur vështirësoi punën e zjarrfikësve, ndërsa gjatë ditës për shuarjen e flakëve u angazhuan edhe 3 helikopterë. Në mbrëmje, ndërhyrja nga ajri u ndërpre.
©ZëriOnline
