Ndahet nga jeta në moshën 63-vjeçare Agim Bubeqi, një prej futbollistëve të brezit të artë të Flamurtarit të Vlorës.
Ish-sulmuesi është gjetur pa jetë në apartamentin e tij në Vlorë. Dyshohet se kishte ndërruar jetë disa ditë më parë. Kanë qenë fqinjët ata që kanë vënë re mungesën e tij dhe kanë njoftuar policinë.
Bubeqi, i lindur më 7 prill 1963 në Vlorë, e kaloi karrierën e tij si futbollist profesionist te Flamurtari. Ai ishte pjesë e skuadrës vlonjate në vitet e saj më të suksesshme dhe në sezonin 1990-1991 ishte pjesë e ekipit që fitoi titullin kampion të Shqipërisë.
Agim Bubeqi veshi edhe fanellën e Kombëtares shqiptare. Sipas të dhënave të FSHF-së dhe databazave sportive, ai zhvilloi 6 ndeshje me përfaqësuesen gjatë viteve 1987-1989. Në vitin 1986 u vlerësua me titullin “Mjeshtër Sporti”, ndërsa po atë vit u përfshi ndër 10 sportistët më të mirë të vitit.
Lajmi për ndarjen e tij nga jeta rikthen kujtimet për një prej figurave të futbollit vlonjat të viteve ’80-’90, periudhë kur Flamurtari shkroi disa nga faqet më të rëndësishme të historisë së tij.
©ZëriOnline
