Një 24-vjeçar ka humbur jetën tragjikisht pasditen e sotme në det, në zonën mes Rjollit dhe Ranës së Hedhun, në Shkodër.
Ngjarja ka ndodhur rreth orës 16:15, në një zonë lundrimi, ku i riu, i cili ndodhej në bord të një gomoneje bashkë me dy persona të tjerë, paraprakisht dyshohet se ka rënë aksidentalisht në det. Sipas Policisë së Shkodrës, ai është dëmtuar rëndë nga helika e motorit të gomones.
Shërbimet e Policisë Kufitare dhe të Njësisë Policore Detare kanë shkuar menjëherë në vendngjarje pas marrjes së njoftimit. Shtetasi Klaus Gjergji është transportuar fillimisht nga shërbimet e Policisë Kufitare dhe më pas me autoambulancë drejt spitalit.
Pavarësisht ndihmës mjekësore, 24-vjeçari ka humbur jetën si pasojë e plagëve të marra.
Ndërkohë, grupi hetimor po vijon veprimet për të zbardhur rrethanat dhe dinamikën e plotë të ngjarjes.
