Një aksident tragjik ka ndodhur mëngjesin e kësaj të premteje në aksin rrugor “Shkozet-Shijak”, në Rrashbull, ku një 32-vjeçar ka humbur jetën.
Sipas informacionit paraprak policor, një automjet ende i paidentifikuar ka përplasur biçiklistin V. H., 32 vjeç. Përplasja ka rezultuar fatale për të riun, i cili ka ndërruar jetë në vendngjarje.
Drejtuesi i automjetit është larguar menjëherë nga vendi i aksidentit, pa i dhënë ndihmë, ndërsa policia ka nisur punën për identifikimin dhe kapjen e tij.
Grupi hetimor ndodhet në vendngjarje dhe, nën drejtimin e Prokurorisë, po punon për zbardhjen e rrethanave dhe shkakut të aksidentit.
Ndërkohë, një tjetër aksident rrugor është regjistruar në orët e para të mëngjesit në Durrës, në rrugën poshtë Vilës së Zogut.
Sipas informacioneve paraprake, një automjet tip “Benz” ka dalë nga rruga dhe ka përfunduar disa metra më poshtë. Në drejtim të mjetit ka qenë një vajzë, e cila është transportuar në spital dhe ndodhet nën kujdesin e mjekëve.
Dy aksidentet janë regjistruar ditën e sotme, duke e nisur mëngjesin me bilanc tragjik në rrugët e Durrësit.
©ZëriOnline
