Një ditë zie dhe për gjimnazin “Leonik Tomeo” në Durrës pas ndarjes nga jeta të 16-vjeçarit Klevis Dervishi, i cili nuk arriti t’u mbijetojë plagëve të marra në aksidentin e rëndë rrugor në aksin Manëz-Sukth.
Përmes një mesazhi prekës, shkolla ka shprehur dhimbjen për humbjen e nxënësit të saj, duke e cilësuar largimin e tij si një humbje të madhe për të gjithë komunitetin shkollor.
“Me pikëllim të thellë morëm lajmin për ndarjen nga jeta të nxënësit tonë Klevis Dervishi, i cili fatkeqësisht nuk arriti t’u mbijetojë plagëve të marra në aksident”, thuhet në reagimin e gjimnazit.
Shkolla shprehet se humbja e një të riu kaq të vogël lë pas një zbrazëti të madhe në zemrat e mësuesve dhe bashkëmoshatarëve të tij.
“Humbja e një shpirti kaq të ri lë një zbrazëti të madhe në zemrat tona dhe në bankat e shkollës. Do të mbetet gjithmonë në kujtimet tona më të bukura”, thuhet më tej në mesazhin e “Leonik Tomeo”.
Në fund, stafi i shkollës u ka shprehur ngushëllimet më të sinqerta familjarëve të 16-vjeçarit, duke përcjellë mesazhin: “Udhëtoftë në paqe dhe kujtimi i tij qoftë i paharruar!”
Klevis Dervishi humbi jetën në Spitalin e Traumës, duke e çuar në katër numrin e viktimave të aksidentit tragjik të së mërkurës në Manëz. Në vendngjarje humbën jetën Kleo Vrioni, 25 vjeç, Sara Brugnatelli, 26 vjeç, dhe Alvi Muhaxhiri, 15 vjeç, kushëri i Kleos. Edhe Muhaxhiri ishte nxënës i të njëjtit gjimnaz në Durrës, për të cilin shkolla pati reaguar 4 ditë më parë me një mesazh të ndjerë.
Në aksident mbeti i plagosur edhe Rejsi Vrioni.
©ZëriOnline
