Mëngjesin e sotëm, disa institucione në qytete të ndryshme të vendit, mes tyre Durrësi, Vlora dhe Fieri, kanë marrë në adresat e tyre elektronike një mesazh kërcënues. Nga një adresë ende e paidentifikuar pretendohet se në këto institucione është vendosur bombë. Në email flitet në emër të Shtetit Islamik dhe i drejtohet të pafeve që sipas dërguesit do të bëhen copash brenda dy orësh nga bomba e vendosur në institucion. Emaili ka mbërritur dhe pranë GJKKO e SPAK.
Në Durrës konfirmohet që emaili ka mbërritur në Bashki dhe Gjykatë, po nuk ka pasur evakuime punonjësish. Thjesht verifikime.
Pas marrjes së njoftimit, policia ka nisur menjëherë verifikimet dhe kontrollet në objektet e përfshira në kërcënim. Deri tani, nga kontrollet e kryera nuk ka rezultuar prania e bombave apo e ndonjë lënde tjetër shpërthyese.
Paralelisht, drejtoria për hetimin e krimeve kibernetike, në bashkëpunim me drejtorinë e antiterrorit dhe agjenci të tjera ligjzbatuese, po punon për identifikimin e autorit dhe gjurmimin e adresës elektronike nga e cila janë dërguar mesazhet.
Policia u bën thirrje qytetarëve të ruajnë qetësinë, ndërsa garanton se strukturat e saj janë të angazhuara për verifikimin e plotë të situatës dhe garantimin e sigurisë publike.
©ZëriOnline
