Kryebashkiaku i Tiranës, Erion Veliaj, nga burgu i Durrësit ku ndodhet, ka marrë vendimin për shkarkimin nga detyra të Anuela Ristanit, kryetares në detyrë të Tiranës.
Veliaj ka tërhequr delegimin e kompetencave Anuela Ristanit për drejtimin e Bashkisë së Tiranës. Në vendimin e Veliajt thuhet se shkarkimi i Ristanit, që mban postin e deleguar që nga shkurti i vitit të kaluar, vjen pas refuzimit të saj të zbatojë urdhrat e Veliaj.
Pas kësaj Ristani mbetet nënkryetare e bashkisë, por ajo personalisht nuk ka reaguar ende ndaj vendimit të Veliajt në të cilin ndër të tjera shkruhet:
“Pas vendimmarrjes së fundit të Gjykatës Kushtetuese, është evidentuar një shkëputje progresive e ushtrimit të kompetencave të deleguara nga autoriteti kushtetues dhe ligjor i Kryetarit të zgjedhur, e materializuar në mungesën e informimit dhe të koordinimit institucional, në moszbatimin e vendimeve gjyqësore në moszbatimin dhe refuzimin e urdhrave të drejtpërdrejt të Kryetarit, si dhe në veprime dhe mosveprime që kanë cenuar zinxhirin normal të përgjegjësisë dhe drejtimit institucional të Bashkisë”.
©ZëriOnline
