Ish-punonjësi i Policisë së Shtetit, Uljan Shpataraku, është transferuar në burgun e Peqinit, pasi Gjykata e Posaçme vendosi ndaj tij masën e sigurisë “arrest në burg”.
Shpataraku u arrestua më 26 gusht në zonën e Plepave, në Durrës, teksa drejtonte automjetin me të cilin udhëtonte biznesmeni Ergys Agasi, i shpallur në kërkim nga SPAK prej rreth tetë muajsh. Në momentin e ndërhyrjes së Policisë, Agasi ndodhej në sediljen e pasagjerit.
Operacioni për arrestimin e tyre nisi pasi automjeti u lokalizua në Elbasan. Strukturat e Policisë e mbajtën nën vëzhgim gjatë lëvizjes në drejtim të Peqinit, Rrogozhinës dhe më pas Durrësit, ku u krye ndërhyrja në zonën e Plepave. Gjatë kontrollit të automjetit raportohet se u gjetën rreth 4 mijë euro.
Shpataraku akuzohet për përkrahje të autorit të krimit
Sipas SPAK, ish-punonjësi i Policisë u arrestua në flagrancë për veprën penale “Përkrahja e autorit të krimit”, pasi në momentin e ndalimit po shoqëronte Agasin, i cili ishte person në kërkim nga drejtësia.
Më 29 gusht, Gjykata e Posaçme vendosi që Shpataraku të qëndrojë në masën e sigurisë “arrest në burg”, ndërsa hetimet për rolin e tij vijojnë.
Shpataraku ka shërbyer më herët në Policinë e Shtetit dhe raportohet se ka qenë person i besuar i ish-drejtorit të Përgjithshëm të Policisë, Ilir Proda.
©ZëriOnline
