Këshilli Bashkiak i Durrësit ka miratuar me votat e këshilltarëve të shumicës dhe opozitës ndryshimet në vendimin për kriteret e vlerësimit dhe trajtimit financiar të sportistëve dhe trajnerëve që përfaqësojnë Durrësin në kompeticionet kombëtare dhe ndërkombëtare.
Ndryshimet u paraqitën si korrigjim i një gabimi material në vendimin nr. 48, datë 9 korrik 2026, pas konstatimit të mospërputhjeve mes relacionit shpjegues dhe tekstit përfundimtar të vendimit.
Një nga ndryshimet kryesore lidhet me vetë subjektin përfitues. Në vend të formulimit që i referohej sportistëve dhe trajnerëve që përfaqësojnë qytetin e Durrësit, kriteret tashmë përcaktojnë Klubin Shumësportësh Teuta si përfaqësuesin që mbulohet nga vendimi.
Ndryshim është bërë edhe në kriterin sportiv për ekipet. Në vend të renditjes nga vendi i parë deri në vendin e katërt në kampionatin kombëtar të kategorisë më të lartë, kriteri përcakton tashmë renditjen nga vendi i parë deri në vendin e dytë, si dhe pjesëmarrjen në play-off.
Ndërkohë, është korrigjuar edhe një kriter që lidhet me trajnerët. Në tekstin e ri përcaktohet se trajneri duhet të jetë përgjegjës për përgatitjen e sportistëve dhe ekipeve të moshave, duke zëvendësuar formulimin e mëparshëm që i referohej përgatitjes së një sportisti të nivelit të lartë.
Sipas relacionit, korrigjimet synojnë të pasqyrojnë vullnetin e institucionit dhe të shmangin paqartësitë në zbatimin e vendimit. Bashkia i referohet nenit 112 të Kodit të Procedurave Administrative, i cili parashikon mundësinë e korrigjimit të gabimeve materiale nga organi që ka nxjerrë aktin.
Ajo që bie në sy në këtë rast është konsensusi politik edhe pse kriteri sportiv ngushtohet. Ndryshimet janë miratuar unanimisht nga këshilltarët e shumicës dhe opozitës në Këshillin Bashkiak të Durrësit.
