Bilanci i të lënduarve gjatë tetë ditëve të protestave në Shqipëri ka arritur në 320 persona. Sipas të dhënave të fundit të Ministrisë së Shëndetësisë dhe Mirëqenies Sociale, të publikuara për periudhën 13–21 tetor 2026, mes të lënduarve janë 192 efektivë të Policisë së Shtetit, 92 protestues dhe 36 kalimtarë.
Në kategorinë e kalimtarëve përfshihen edhe gjashtë përfaqësues të medias, njëri prej të cilëve është gazetar i huaj.
Vetëm gjatë protestës së djeshme, tetë persona kanë marrë trajtim mjekësor në Spitalin Universitar të Traumës dhe në Qendrën Spitalore Universitare “Nënë Tereza” (QSUT).
Sipas njoftimit zyrtar, në Spitalin Universitar të Traumës u paraqitën gjashtë persona të lënduar: një efektiv policie, një protestues dhe katër kalimtarë.
Tre prej kalimtarëve u shtruan në spital për trajtim të mëtejshëm. Njëri prej tyre iu nënshtrua një ndërhyrjeje kirurgjikale, e cila përfundoi me sukses. Sipas Ministrisë së Shëndetësisë, gjendja e pacientit është e mirë.
Ndërkohë, në QSUT u paraqitën dy persona, një efektiv policie dhe një protestues. Të dy morën mjekimin e nevojshëm dhe u larguan nga spitali që ditën e djeshme.Ministria bën me dije se aktualisht në Spitalin Universitar të Traumës vijojnë të marrin trajtim nëntë persona të lënduar gjatë protestave.
Ata ndahen në katër protestues, një efektiv policie, një përfaqësuese të medias dhe tre kalimtarë.
Të dhënat janë administruar nga strukturat shëndetësore në Spitalin Universitar të Traumës, QSUT dhe spitalet rajonale të Durrësit, Vlorës dhe Lezhës.
©ZëriOnline
